Кога избираме каде ќе одиме на одмор, критериумите можат да бидат многу различни – од цените и временските услови до храната, содржините и близината до природата. За оние на кои за време на патувањето им е важно и чувството на благосостојба, новата листа издвојува една европска престолнина.
Според Holiday Happiness Index на платформата BookRetreats, Лисабон е дестинацијата која нуди најдобри услови за „среќен одмор“. Истражувањето анализирало 47 дестинации, земајќи ги предвид изложеноста на сончева светлина, можностите за пешачење, физичката активност, количината на зелени површини, достапноста на здрава храна и квалитетот на сонот.
Анализата била спроведена со стручна поддршка од Натали Датило-Рајан, клиничка психолошка поврзана со Универзитетот Харвард и специјалистка за холистички пристап кон среќата.
Храна, зеленило и сонце како рецепт за добар одмор
Еден од факторите по кои Лисабон особено се издвојува е храната. Според резултатите од истражувањето, речиси 10 проценти од рестораните во португалската престолнина спаѓаат во категоријата здрава исхрана, што е втор најголем удел меѓу градовите опфатени со индексот.
Авторите на истражувањето ја истакнуваат и разновидноста на понудата, како и релативната пристапност на храната. Од свежа риба и морски плодови до традиционални таверни, според нивната проценка, во Лисабон е можно да се јаде квалитетно без преголемо оптоварување на буџетот.
Градот е високо рангиран и кога станува збор за пешачењето. Иако е познат по стрмните улици и нерамниот терен, неговата релативно компактна структура овозможува голем дел од градот да се истражи без автомобил. Прошетките дополнително ги збогатуваат бројните видиковци од кои се пружа поглед кон градот и реката Тежо.
Не недостигаат ниту зелени површини. Според податоците од истражувањето, Лисабон има околу 49 квадратни метри зелена површина по жител, речиси четири пати повеќе од Мадрид.
Близината на природата е уште една предност. Плажите во Кашкаиш и Коста да Капарика се оддалечени помалку од еден час со јавен превоз, па жителите и посетителите релативно брзо можат да ги заменат градските улици со брегот на Атлантикот.
Тука е и еден прилично очигледен фактор – сонцето. Лисабон има околу 2.828 сончеви часа годишно, што според авторите на студијата е еден од елементите што може да придонесе за подобро расположение.
„Лесно е да се разбере зошто овој град може позитивно да влијае врз нашето расположение“, се наведува во заклучоците од истражувањето.
Генералниот директор на Туристичката организација на Лисабон, Антонио Вале, истакнал дека градот се разликува од другите дестинации токму по различните начини на кои посетителите можат да го доживеат и истражат, а притоа да се зачуваат карактеристиките што го прават препознатлив.
Европските градови доминираат на листата
Лисабон не е единствениот европски град на врвот на Holiday Happiness Index. На второто место се наоѓа Хелсинки, кој особено се издвојува по зелените површини, мирот и можностите за престој во природа.
Според истражувањето, Хелсинки има околу 126 квадратни метри зелена површина по жител. Градот се издвојува и по безбедните улици, ефикасниот јавен превоз и можноста голем дел од него да се истражи пеш.
Третото место го зазема Орландо во Соединетите Американски Држави. Покрај големите туристички атракции, како Дизниленд и Universal Studios, авторите на индексот ги истакнуваат неговите паркови, езера и големиот број сончеви часови. Орландо има околу 2.930 сончеви часа годишно.
Од четвртото место па натаму, листата е целосно европска. Следуваат Атина, Единбург, Мадрид, Виена, Будимпешта, Осло и Вилнус, кој ја заокружува листата на десетте водечки дестинации.
Резултатите покажуваат дека идејата за „добар одмор“ не се сведува само на атракциите што ги нуди еден град. Според критериумите на ова истражување, достапноста на природата, можностите за движење и пешачење, здравата храна, сонцето и условите за квалитетен одмор исто така можат значително да влијаат врз целокупното искуство од патувањето.