Можете да изберете голем кревет, поглед кон градот, спа-центар, базен на покривот и појадок кој изгледа како штотуку да пристигнал од Инстаграм. Но, кога ќе легнете, можеби ќе сфатите дека собата е веднаш до лифтот, дека низ ѕидот се слуша секој разговор од соседната соба или дека клима-уредот звучи како стар трактор.
И воопшто не станува збор за ситница. По чистотата, бучавата е една од најчестите забелешки на хотелските гости. А во време кога сè повеќе зборуваме за квалитетен сон, одмор и велнес, добриот сон станува една од најважните работи што ги очекуваме кога резервираме хотел.
Токму тука се појавува проблемот: хотелот може да ја контролира температурата во собата, чистотата, квалитетот на душекот и појадокот. Но, кога станува збор за бучавата, работите стануваат многу покомплицирани.
Не е секоја бучава иста
Понекогаш проблемот е во самата зграда. Понекогаш во гостите. А понекогаш во градот.
Хотел во центарот на Њујорк може да постави квалитетни прозорци, но тешко може да ги замолчи сирените, сообраќајот и ноќниот живот. Хотел во Њу Орлеанс може да има одлична звучна изолација, но музиката од улицата сепак може да најде пат до собата.
А тука се и лифтовите, ходниците, вратите што се трескаат, клима-уредите, фрижидерите, автоматите за мраз, конференциските сали, базените... И, секако – другите гости.
За разлика од авионите, каде што при резервацијата најчесто можете да го видите распоредот на седиштата и да изберете дали сакате место до прозорец или до премин, во хотелите најчесто воопшто не знаете каде точно ќе спиете.
Можете да резервирате соба, но не можете да видите дали таа се наоѓа покрај лифтот, над хотелскиот бар или спроти собата на семејство со три мали деца.
Експертите од хотелската индустрија веќе извесно време укажуваат токму на овој апсурд: ако гостинот може да избере конкретно седиште во авион, зошто да не може да избере и конкретна соба во хотел?
Зошто хотелите едноставно не ги направат ѕидовите звучно изолирани?
Одговорот е едноставен – поради парите. Современата градба може значително да го намали пренесувањето на звукот меѓу собите, но квалитетната звучна изолација мора да се планира уште при проектирањето на објектот.
Постојат и градежни стандарди кои одредуваат колку звук треба да пропуштаат ѕидовите. Ѕид со висок степен на звучна изолација може да направи обичниот разговор од соседната соба речиси воопшто да не се слуша. Проблемот е што огромен број хотели не се изградени според денешните стандарди.
Дури и кога хотелот ќе започне со реновирање, подобрувањето на ентериерот понекогаш може да ја промени акустиката и, парадоксално, дополнително да ја влоши ситуацијата.
Бетонските ѕидови, двојните ѕидови и поквалитетните прозорци можат многу да помогнат, но се поскапи, бараат повеќе материјали и покомплицирана изградба.
Со други зборови, тишината чини.
Затоа се појавува нов хотелски луксуз – добриот сон
Хотелите препознаа нова можност. Ако гостите се подготвени да платат повеќе за квалитетен сон дома, зошто да не платат и за него додека патуваат?
Така се развива трендот наречен „sleep tourism“, односно туризам насочен кон спиење и одмор – патувања чија една од главните цели е токму квалитетниот сон.
Некои хотели нудат специјални „sleep“ соби и апартмани, избор на перници, маски за спиење, специјални кревети, звуци за релаксација и други содржини кои треба да им помогнат на гостите добро да се наспијат.
Но, постои една „финта“ – ваквиот луксуз најчесто доаѓа со повисока цена.
Како сами да го избегнете хотелскиот кошмар?
Ако не сакате одморот да ви започне со броење колку пати се отворил лифтот во текот на ноќта, постојат неколку едноставни трикови.
Побарајте соба што е можно подалеку од лифтот. Ова е веројатно најважното правило. Лифтовите се особено проблематични бидејќи звукот се повторува во текот на целата ноќ.
Побарајте соба на повисок кат. Во многу хотели тоа може да значи помалку бучава од улицата, иако ова не е универзално правило.
Аголната соба често е подобар избор. Аголните соби можат да имаат помалку соседни соби, па така е помала веројатноста дека ќе ги слушате соседите.
Ако можете, побарајте соба која не е веднаш до друга зафатена соба. Ова е особено корисно ако знаете дека сте чувствителни на бучава.
Наведете го барањето уште при резервацијата. „Quiet room“, „away from elevator“ или „higher floor“ се едноставни забелешки што хотелот може да ги земе предвид доколку има можност.
И не чекајте да легнете во кревет за да ја пријавите бучавата. Ако проблемот е сериозен, веднаш побарајте промена на собата.
А понекогаш најдоброто решение е – пар чепчиња за уши
Хотелите сè почесто им оставаат на гостите чепчиња за уши и маски за спиење, особено во прометните градови. Можеби тоа не е луксузот што сте го очекувале кога сте платиле хотелска соба, но функционира.
Постојат дури и специјализирани веб-страници кои ги оценуваат хотелите токму според тоа колку се тивки, земајќи ги предвид околниот сообраќај и ноќниот живот, конструкцијата на зградата, квалитетот на прозорците и местоположбата на собите.
Бидејќи реалноста на хотелскиот одмор е малку иронична: можете да потрошите стотици евра за совршен хотел, а потоа да сфатите дека најдобрата работа што сте ја понеле од дома се – чепчињата за уши.
А можеби токму тишината ќе стане новиот хотелски луксуз. Не уште еден „infinity“ базен, не подобар поглед и не поголем телевизор. Само осум часа без туѓи разговори, лифтови и бучни клима-уреди.
Што, кога подобро ќе размислите, и не е толку многу да се побара од соба за која сте платиле за да можете мирно да преспиете.