Новите максимални малопродажни цени стапија во сила денеска, 29 септември, во 00:01 часот, согласно последната одлука на Регулаторната комисија за енергетика.
Со новата пресметка, ЕУРОДИЗЕЛ БС сега чини најмногу 100 денари за литар, што претставува намалување од 4,50 денари во однос на претходната цена.
Кај бензините движењето е во спротивна насока. ЕУРОСУПЕР БС-95 поскапе за еден денар и сега чини 100 денари за литар, додека ЕУРОСУПЕР БС-98 се продава по максимални 102 денари за литар.
Тоа значи дека од денеска дизелот и бензинот од 95 октани имаат иста максимална цена – 100 денари за литар.
Поевтинува и екстра лесното масло за домаќинство, и тоа за три денари, па новата максимална цена изнесува 111,50 денари за литар. Мазутот М-1 НС се намалува за 0,196 денари и сега изнесува 49,882 денари за килограм.
Според РКЕ, со последната одлука просечните малопродажни цени на нафтените деривати се намалуваат за 1,06% во однос на претходната пресметка. На светските пазари во референтниот период цената на дизелот бележела пад, што се одразило и врз новата домашна пресметка.
Дополнително, продолжена е мерката со која ДДВ за дизелот е намален од 18 на 10%, а според објавените информации таа треба да важи до 12 октомври.