Сончевото време, блискоста, чистото море и богатата понуда на недвижности ја прават Грција омилена дестинација за одмор – и сè почесто, за купување викендички и куќи покрај море. Македонските граѓани, под истите услови како и граѓаните на ЕУ, можат да станат сопственици на имот во поголемиот дел од земјата, со исклучок на неколку воено-стратешки зони каде е потребна посебна дозвола.
Еве ги чекорите кои треба да ги следите ако планирате да купите имот во Грција:
Чекор 1: Проверете ја локацијата
Осигурајте се дека областа не е во „ограничена зона“. Во туристичките региони како Халкидики, Крит, Пелопонез и Лефкада купувањето е дозволено без проблеми.
Чекор 2: Добијте грчки даночен број (AFM)
Аплицирајте во локална даночна канцеларија со пасош и пополнет формулар. Овој број е задолжителен за сите имотни трансакции, вклучително и отворање банкарска сметка.
Чекор 3: Отворете банкарска сметка во Грција
Ќе ви биде потребна за плаќање на депозитот, даноците и идните комунални услуги.
Чекор 4: Изберете имот и ангажирајте агент/адвокат
Адвокатот ја проверува сопственоста, долговите и законската исправност на имотот. Овој чекор е клучен за да избегнете ризици.Многу имоти во Грција се дивоградби а многу од нив се и под хипотека. бидете крајно внимателни!
Чекор 5: Потпишете преддоговор и платете депозит
Обично депозитот е околу 10% од вкупната цена. Преддоговорот го резервира имотот додека трае правната и техничката проверка.
Чекор 6: Потпишете главен договор пред нотар
Ова се прави во присуство на адвокат, а потоа имотот се регистрира во катастар – со што станувате официјален сопственик.
Чекор 7: Платете ги даноците и таксите
- Данок на пренос: ~3% од вредноста за стари објекти
- ДДВ: 24% за нови објекти (во одредени случаи)
- Дополнителни трошоци: 5–12% од цената (нотари, адвокати, катастар, агенција)
Чекор 8: Годишни обврски
Сите сопственици плаќаат ENFIA – годишен данок на имот (2–16 € по м²). Приходите од изнајмување се оданочуваат, а до крајот на 2026 година нема данок на капитална добивка при продажба.
Чекор 9: Златна виза (опционално)
Инвестиција од минимум 250.000 € овозможува добивање постојан престој и слободно движење низ Шенген. Во популарни региони, минимумот е 400.000 €.
Цени по региони (€/m²)
- Халкидики: 2.000 – 10.000
- Миконос и Парос: до 12.000
- Антипарос: 6.400 – 9.800
- Китнос: до 9.000
- Санторини: 4.500 – 7.500
- Наксос, Сирос, Андрос, Тинос: од 2.300
- Родос: до 6.750
- Сими: до 6.000
- Хидра (Атика): 4.000 – 7.500
- Пелопонез:
- Арголис: до 6.000
- Месинија: 2.000 – 5.500
- Лаконија: 1.200 – 3.800
- Коринтија: 2.000 – 3.500