Како превенција, се препорачува поставување комарници, отстранување на застоена вода, редовно чистење на олуците, носење облека со долги ракави и ногавици, како и употреба на средства против комарци. Граѓаните се советуваат, кога е можно, да избегнуваат престој на отворено во периодите на зори и самрак, кога комарците се поактивни.
Од Град Скопје најавуваат нови третмани против комарци, а во општините кои се идентификувани како жаришта се преземаат дополнителни мерки. Сепак, покрај прскањето, важно е граѓаните навреме да добиваат јасни и конкретни информации за тоа каде се регистрирани жариштата, кога ќе се спроведуваат третманите и како треба да постапат доколку почувствуваат симптоми.
Голем дел од луѓето заразени со вирусот на западен Нил воопшто немаат симптоми. Кај дел од заразените, пак, може да се појави поблага форма на болеста, која најчесто вклучува:
- температура;
- главоболка;
- замор и чувство на слабост;
- болки во мускулите и зглобовите;
- мачнина, повраќање или дијареја;
- во одредени случаи и осип.
Симптомите обично се појавуваат од 2 до 14 дена по инфекцијата. Доколку во тој период се јави температура без очигледна причина или комбинација од овие симптоми, особено во услови на актуелна циркулација на вирусот, препорачливо е да се консултирате со лекар.
Постои и поретка, но многу посериозна форма на болеста, при која може да биде зафатен нервниот систем. Висока температура, силна главоболка, вкочанет врат, збунетост или дезориентација, тресење, грчеви, мускулна слабост, вкочанетост или парализа се предупредувачки знаци за кои е потребна итна медицинска проценка.
Според Светската здравствена организација, приближно 1 од 150 заразени лица може да развие тешка форма на западнонилска треска која го зафаќа централниот нервен систем.