Според предложеното решение, студентскиот оброк би се користел преку нова дигитална услуга наречена „М-студентски оброк“, која би била достапна во апликацијата „М-услуги“.
Преку неа студентите би можеле да купуваат храна и пијалаци во вклучените ресторани, маркети и млечни ресторани, со исклучок на алкохол и цигари.
Дополнителни попусти и по искористувањето на субвенцијата
Предлогот предвидува и можност за дополнителни попусти кај трговците, кои би важеле дури и откако студентите ќе ги потрошат средствата од месечната субвенција.
За оваа можност допрва треба да се разговара со трговските компании.
Кога би започнала примената?
Предлогот веќе им е претставен на студентските парламенти на универзитетите, чии претставници треба да се консултираат со студентите и да го достават својот став.
Како што информираше премиерот, за реализација на новиот модел ќе биде потребна подготовка на софтверско решение и спроведување тендерска постапка.
Засега зголемувањето на студентскиот оброк на 4.500 денари е само предлог, а конечна одлука и датум за почеток на примената сè уште не се објавени.