Наро, град во провинцијата Агриџенто на југозападот на Сицилија, се приклучи на сè поголемиот број италијански места кои напуштените и запуштени недвижности ги нудат по симболична цена од едно евро. Целта е да се оживее историскиот центар, да се обнови напуштениот станбен фонд, да се спречи депопулацијата и да се поттикне локалниот туризам.
Програмата е отворена и за странски државјани, под услов да ги исполнат пропишаните критериуми за купување и обновување на недвижноста.
За заинтересираните купувачи постои и посебна онлајн платформа „Case 1 Euro Naro“, достапна на повеќе јазици, преку која можат да ги разгледаат понудените недвижности и да поднесат пријава. Секоја недвижност има свој код, а процесот вклучува проверка на документацијата, техничките услови и предлогот за реновирање.
Што всушност добивате за едно евро?
Не баш готова куќа за живеење.
Недвижностите кои моментално се нудат се објекти на кои им е потребна реконструкција. Тоа значи дека, покрај симболичната купопродажна цена, купувачот треба да смета на низа дополнителни трошоци.
Меѓу нив се нотарските и административните такси, трошоците за регистрација и даноците, но најголемиот трошок е самата обнова на објектот.
Купувачот треба да го финансира изработувањето на проектот, градежните работи, како и усогласувањето на објектот со безбедносните, урбанистичките и другите прописи. Во рамките на програмата постојат и обврски и рокови поврзани со реализацијата на реновирањето.
Со други зборови – едното евро е само почетокот.
Слични програми низ Италија веќе со години привлекуваат купувачи од странство, но принципот најчесто е ист: градовите нудат напуштени објекти по симболична цена, во замена за обврска новите сопственици да ги обноват.
Сицилија и понатаму е едно од подрачјата со најголем број вакви програми.
Зошто токму Наро?
Градот има историски центар со барокна архитектура, замокот Кјарамонтaно и поглед кон внатрешноста на провинцијата Агриџенто, а неговата локација овозможува пристап и до јужниот брег на Сицилија.
Токму културно-историскиот потенцијал на градот е една од причините поради кои локалните власти сакаат да привлечат нови жители и инвеститори.
Наро е познат и по MAN – музеј на отворено, кој настанал по свлечиштето во 2005 година, кога млади уметници почнале да ги украсуваат фасадите на дел од напуштените објекти.
Во градот се наоѓа и Porta d’Oro, средновековната Златна порта која датира уште од 13 век.
Значи, ако идејата за сопствена куќа на Сицилија за едно евро ви звучи примамливо – понудата навистина постои.
Само имајте предвид: куќата можеби ја купувате за едно евро, но животот во неа дефинитивно не чини едно евро.