500-те најбогати луѓе во светот станаа значително побогати во 2024-та година, со претприемачот Илон Маск, ко-основачот на „Facebook“, Марк Цукерберг и ко-основачот и претседател на „Nvidia“, Џенсен Хуанг, кои ја предводат групата милијардери до нова пресвртница: комбинирана нето вредност од 10 трилиони долари, пишува „Bloomberg“.
Незапирливиот пораст на цената на акциите на американските технолошки компании одигра клучна улога во зголемувањето на богатството на триото, како и зголеменото богатство на ко-основачот на „Oracle“, Лери Елисон, основачот на „Amazon“, Џеф Безос, основачот на „Dell Technologies“, Мајкл Дел и „Google“ ко-основачот Лери Пејџ и Сергеј Брин.
Само овие осум луѓе наведени погоре го зголемија своето богатство за вкупно над 600 милијарди долари оваа година, што претставува 43% од вкупниот пораст на богатството (1,5 трилиони долари) за 500 најбогати луѓе во светот.
Но, токму Маск – новиот „прв пријател“ на новоизбраниот американски претседател Доналд Трамп – доминира меѓу најбогатите во светот во 2024-та година.
Неговиот близок однос со идниот претседател помогна да се зголеми пазарната капитализација на неговите компании, вклучувајќи ги „Tesla Inc.“, „SpaceX“ и „xAI“. Ова го зголеми неговото богатство на невидени 442,1 милијарди долари, со 213 милијарди долари повеќе од регистрираните на почетокот на годината. Разликата од 237 милијарди долари меѓу него и Безос е најголемиот некогаш забележан меѓу првиот и вториот на рангирањето на светските милијардери на „Bloomberg“.
Севкупно, најбогатите во светот имаа корист од берзанскиот оптимизам што им пркоси на очекувањата во 2024-та година. Широкиот S&P 500 порасна за 24% на 30-ти декември, поттикнат од мала група технолошки акции познати како „Magnificent Seven“, која ги вклучува „Tesla“ на Маск, „Meta“ на Цукерберг и „Nvidia“ на Хуанг.
Изборната победа на Трамп ги поддржа добивките меѓу берзанските индекси: S&P 500 достигна највисоко ниво на сите времиња на 6-ти ноември, забележувајќи го својот најсилен учинок по денот на изборите.
Милијардерите претставени во индексот заработиле вкупно 505 милијарди долари во петте недели по изборите или 34% од вкупните приходи за годината.
Победата на Трамп, исто така, предизвика историски митинг меѓу дигиталните средства, покренувајќи ја цената на биткоинот над 100.000 долари за прв пат во историјата на криптовалутите.
Од ова имаа корист и крипто-милијардерите. Богатството на Чангпенг Жао од „Binance Holdings“ скокна за 60% на 55 милијарди. долар. Нето вредност на ко-основачот на „Coinbase Global Inc“ Брајан Армстронг, пак, се зголеми за повеќе од 50% до 11,1 милијарди долари.
Вкупното богатство на 500-те најбогати луѓе во светот, вклучени во индексот на милијардери на „Bloomberg“, достигнува 9,8 трилиони долари на затворањето на тргувањето на 30-ти декември, што е малку под врвот од 10,1 трилиони долари, регистриран на 11-ти декември.
Тоа богатство е еквивалентно на комбинираниот бруто домашен производ на Германија, Јапонија и Австралија, покажуваат податоците на Светската банка.
Извор: denar.mk
