Само во последните пет години бројот на патнички автомобили во земјава е зголемен за повеќе од 40 проценти. Од околу 429.000 автомобили во 2020 година, бројката во 2025 година надминала 615.000 возила, покажува анализата на МИА базирана на податоци од Државниот завод за статистика.
Уште поголема е разликата ако се погледне периодот од една деценија. Во 2015 година во земјава имало околу 383.000 регистрирани автомобили, што значи дека до 2025 година нивниот број се зголемил за околу 60 проценти.
Но, поголемиот број автомобили не значи и понов возен парк. Просечната старост на автомобилите во Македонија останува висока и изнесува 19,3 години.
Дизелот убедливо доминира на македонските патишта
Најголем дел од автомобилите што денес се движат по македонските патишта користат дизел.
За пет години бројот на дизел-автомобили е зголемен за околу 67 проценти, односно за приближно 186.000 возила. Во 2025 година тие сочинувале 63,8 проценти од вкупниот возен парк.
Во спротивна насока се движат бензинските автомобили. Нивниот број е намален за околу 24.352 возила, односно за приближно 13 проценти. Нивното учество во возниот парк се намалило и во 2025 година изнесувало 25,7 проценти.
Возилата на ТНГ, пак, задржуваат релативно стабилен удел од околу 9 проценти.
Електричните автомобили растат брзо, но сè уште се реткост
Иако електричните возила бележат огромен процентуален раст, нивното реално присуство на македонските патишта сè уште е мало.
За десет години нивниот број е зголемен околу 30 пати, но во 2025 година во земјава имало само 2.047 електрични автомобили.
Тоа претставува околу 0,33 проценти од вкупниот број автомобили.
Значително побрзо се пробиваат хибридните возила. Во 2023 година биле регистрирани 1.287 хибриди, во 2024 година нивниот број пораснал на 5.078, а во 2025 година достигнал 7.393 автомобили.
Со тоа хибридите веќе учествуваат со околу 1,2 проценти од вкупниот возен парк.
На еден нов автомобил се увезуваат 3,5 половни
Една од причините за високата просечна старост на автомобилите е доминацијата на увозот на половни возила.
Во последните десет години повеќе од 80 проценти од увезените автомобили биле половни, а во 2025 година на секој еден нов автомобил се увезувале околу 3,5 половни возила.
Така, иако бројот на автомобили постојано расте, просечната старост останува висока – што значи дека на патиштата има сè повеќе возила, но голем дел од нив се постари.
Секој трет автомобил е во Скопје
Околу една третина од сите регистрирани возила во Македонија се концентрирани во Скопје.
Сепак, уделот на главниот град постепено се намалува кај различните категории возила, што покажува дека моторизацијата во последните години расте побрзо во останатите делови од земјата.
Во последните пет години бројот на патнички автомобили е зголемен за 43,4 проценти на ниво на Македонија, додека во Скопје растот изнесува 32,2 проценти.
Уште поголема промена има кај мотоциклите. Нивниот број е зголемен за дури 165,7 проценти во Македонија, а во Скопје за 123,9 проценти.
Од 122 на 338 автомобили на 1.000 жители
Пред 35 години сликата на македонските улици била значително поинаква.
Во 1991 година автомобилот сè уште претставувал важен статусен симбол, а во многу семејства едно возило било доволно за целото домаќинство.
Тогаш во Македонија имало околу 122 автомобили на 1.000 жители.
Во 2025 година бројката достигнала 338 автомобили на 1.000 жители, што значи дека степенот на моторизација од независноста до денес е зголемен приближно 2,5 пати.
Возниот парк се зголемувал побрзо од населението, што укажува на значително поголема достапност на автомобилите во споредба со почетокот на 1990-тите.
Повеќе автомобили, но и повеќе автопати
Паралелно со растот на бројот на возила се проширувала и патната инфраструктура.
Во периодот од независноста до 2025 година должината на автопатиштата во Македонија е зголемена од приближно 120 на околу 347 километри.
Тоа значи дека автопатската мрежа е повеќе од двојно проширена, а значителен дел од растот се случил по 2005 година. Во 2010 година земјава располагала со околу 251 километар автопат.
Колку плати биле потребни за автомобил тогаш, а колку денес?
Интересна е и споредбата на достапноста на нов автомобил.
За еден од најевтините нови автомобили на пазарот во периодот 1991 – 1995 година, како „Југо Корал 45“, биле потребни приближно 30 до 33 тогашни просечни плати.
Денес нов автомобил од економската класа, со цена меѓу 15.000 и 20.000 евра, би чинел приближно 20 до 28 просечни плати.
Од „југо“, „стојадин“ и „голф“, до SUV-модели, хибриди, електрични автомобили и возила со современи дигитални системи – возниот парк е една од највидливите промени што Македонија ги доживеа во изминатите 35 години.