Предлогот, познат како EU Kids Act, предвидува различни ограничувања во зависност од возраста на детето, како и построги обврски за технолошките компании.
Според документ на Европската комисија во кој увид имал „Ројтерс“, предлогот треба официјално да го претстават претседателката на Европската комисија Урсула фон дер Лајен и еврокомесарката за технологија Хена Виркунен.
Самостоен профил дури по наполнети 15 години
Една од најголемите промени се однесува на возраста од која младите би можеле самостојно да отвораат профили на одредени онлајн платформи.
Според нацртот, корисниците со наполнети 15 години би можеле самостојно да креираат профил.
За децата на возраст од 13 и 14 години правилата би биле построги. Тие би можеле да користат социјални мрежи и видеоплатформи само со согласност и задолжителен надзор од родителите.
Дополнително, би имале ограничен број контакти и строго определено време кое можат да го поминуваат на платформите.
Уште построги правила за помалите деца
За децата на возраст од три до 12 години, контролата врз профилите целосно би била во рацете на родителите.
На оваа возрасна група би ѝ биле достапни само услуги кои исполнуваат високи стандарди за безбедност и се специјално приспособени за деца.
За децата помлади од три години, пак, пристапот до ваквите услуги би бил целосно забранет.
Платформите ќе мора да ја проверуваат возраста
Доколку предложените правила бидат усвоени, поголема одговорност ќе имаат и самите технолошки компании.
Социјалните мрежи и видеоплатформите ќе треба да ја проверуваат возраста на корисникот при отворањето профил.
Кај платформите за онлајн игри, проверката на возраста ќе треба да се направи пред играта да биде преземена.
Тоа би требало да го отежне заобиколувањето на старосните ограничувања со едноставно внесување лажна година на раѓање.
На удар и алгоритмите што создаваат зависност
Новите правила не се однесуваат само на возраста на корисниците.
Од технолошките компании ќе се бара да избегнуваат дизајн и функционалности кои можат да поттикнат прекумерно и зависничко користење на платформите, како и алгоритми кои можат да ги изложат децата на штетна содржина.
Платформите ќе треба да понудат и поедноставни механизми за пријавување несоодветна или штетна содржина, како и поефикасни алатки преку кои родителите ќе можат да го контролираат користењето на услугите.
Предлогот предвидува и посебен надомест што би го плаќале компаниите, а собраните средства би се користеле за финансирање на надзорот и спроведувањето на новите правила.
Предлогот сè уште не е конечен
Важно е да се нагласи дека станува збор за предлог кој сè уште може да биде изменет.
По официјалното претставување, Европската комисија треба да започне преговори со земјите членки и Европскиот парламент за конечната верзија на правилата.
Се очекува целиот процес да трае неколку месеци, што значи дека предложените ограничувања не стапуваат веднаш во сила.
Доколку пакетот биде усвоен во предложената форма, тоа би претставувало една од најголемите промени досега во начинот на кој децата и тинејџерите во Европската Унија пристапуваат до социјалните мрежи, онлајн игрите и останатите дигитални услуги.