Еден од огласите што привлече внимание е за 30 тони вранец по само 8 денари за килограм, при што купувачот треба сам да ја изврши бербата.
Лозарите велат дека со вакви цени тешко ги покриваат трошоците за целогодишната работа, обработката, препаратите и бербата. Дел од нив отворено велат дека веќе размислуваат да ги напуштат лозјата.
Дополнителен проблем е и пласманот. Според производителите, околу 90 отсто од грозјето сè уште не е обрано, а винарниците не го преземаат родот во очекуваниот обем. Дел од лозарите размислуваат грозјето да го преработат во ракија, само за да не им пропадне.
Производителите бараат итен откуп, дополнителна субвенција и конкретни мерки од институциите, со предупредување дека без решение за пласманот, иднината на лозарството е сериозно загрозена.
За дел од нив, ова веќе не е само лоша сезона, туку момент во кој треба да одлучат дали воопшто ќе продолжат да се занимаваат со лозарство.