Ова го покажуваат последните обработени податоци од Анкетата за цената на трудот на Државниот завод за статистика.
Ако годишниот просек од 788.066 денари се распореди на 12 месеци, станува збор за трошок од околу 65.672 денари месечно по вработен. Овој износ не треба да се поистоветува со нето-платата што работникот ја добива на својата сметка, туку ја претставува просечната цена на трудот за работодавачот.
Најголем трошок во информациите и комуникациите
Убедливо највисок просечен годишен трошок е забележан во секторот Информации и комуникации, каде што во 2024 година достигнал 1.453.846 денари по вработен.
Меѓу секторите со трошок поголем од еден милион денари годишно се и Снабдување со електрична енергија, гас, пареа и климатизација, со 1.116.070 денари, како и Финансиски дејности и дејности на осигурување, со 1.101.922 денари.
Во Рударство и вадење камен, просечниот годишен трошок изнесувал 1.028.458 денари, додека кај Стручните, научните и техничките дејности достигнал 962.012 денари.
Колку изнесуваат трошоците во останатите сектори?
Во Дејностите на здравствена и социјална заштита, просечниот годишен износ по вработен бил 811.691 денар, додека во Уметност, забава и рекреација изнесувал 779.265 денари.
Во градежништвото трошокот достигнал 773.812 денари, а во преработувачката индустрија 714.309 денари.
Кај трговијата на големо и мало и поправката на моторни возила и мотоцикли просекот бил 733.477 денари, додека во образованието изнесувал 681.903 денари.
Во транспортот и складирањето работодавачите во просек имале годишен трошок од 661.181 денар по вработен, а кај административните и помошните услужни дејности – 641.580 денари.
Од наведените сектори, најнизок износ е забележан кај објектите за сместување и сервисните дејности со храна, каде што просечниот годишен трошок изнесувал 565.491 денар по вработен.
Еден одработен час во просек чини 450 денари
Статистиката покажува и колкав бил просечниот трошок за фактички одработен час. Во 2024 година тој изнесувал 450 денари.
Истовремено, вкупниот годишен просек на фактички одработени часови по вработен бил 1.752 часа.
За подготовката на Анкетата за цената на трудот за 2024 година, Државниот завод за статистика користел и административни податоци од Управата за јавни приходи и Агенцијата за вработување.