Прогнозите за воздушниот притисок во текот на претстојната есен покажуваат модели кои повеќе наликуваат на типичните зимски реакции поврзани со Ел Нињо. Причина за тоа, според проценките, може да биде неговиот невообичаено силен интензитет.
Временските прилики на глобално ниво се поврзани и со ENSO-системот, односно Јужната осцилација на Ел Нињо, која се менува меѓу топлата фаза Ел Нињо и ладната фаза Ла Ниња. Овие фази вообичаено се менуваат во период од една до три години и имаат значително влијание врз глобалната циркулација и временските услови.
Промените меѓу фазите се под влијание на тропските пасатни ветрови. Кај „Супер Ел Нињо“, затоплувањето на Тихиот Океан е многу поинтензивно од вообичаеното, поради што и неговото влијание врз времето може да биде посилно. Додека Ел Нињо се појавува на секои неколку години, „Супер Ел Нињо“ е значително поредок феномен, кој се јавува еднаш во десетина години или уште поретко. Последните три вакви настани се регистрирани во сезоните 2015/2016, 1997/1998 и 1982/1983 година.
Што се очекува наесен?
Според проценките за периодот од септември до ноември, над Северниот Атлантик би можела да се развие област со низок воздушен притисок која ќе се протега кон северозападна Европа. Таквиот распоред може да овозможи потопли воздушни маси од југ да се движат кон северните и североисточните делови.
Поради тоа, во поголем дел од Европа се предвидуваат натпросечни температури, при што најизразени отстапувања се очекуваат во централна, западна и југоисточна Европа.
Прогнозите, исто така, укажуваат на натпросечни количества врнежи низ голем дел од континентот. Влагата што ќе пристигнува од Атлантикот би можела да го зголеми потенцијалот за дожд, особено во јужните и западните области.
Почетокот на снежната сезона во ноември, според овие проценки, би можел да биде побавен од вообичаеното, а снежната покривка да остане под просекот. Исклучок би можеле да бидат повисоките планински предели, меѓу кои и западните Алпи.
Послаб поларен вртлог – поголема шанса за студ и снег
Секоја есен се формира поларен вртлог, кој има важна улога во обликувањето на зимските временски услови и може да влијае врз целата сезона, од ноември до март.
Како што наведуваат од „Severe Weather Europe“, фазата Ел Нињо е поврзана со поголема веројатност за слабеење или колапс на поларниот вртлог во средината на зимата. Кога поларниот вртлог е слаб, тој потешко го задржува студениот воздух во поларните предели, па тој полесно може да се спушти кон средните географски широчини.
Тоа, во превод, може да значи поголема веројатност за постудена зима и повеќе снег. Сепак, овие сезонски прогнози покажуваат можни долгорочни временски модели, а не гарантираат точно какви услови ќе има во секој регион и во секој период од зимата.