Според податоците на Гигметар, Македонија е меѓу земјите во регионот со значителен број онлајн работници во однос на населението. Тоа значи дека промените на глобалниот фриленс пазар можат директно да погодат голем број луѓе и кај нас.
ВИ денес може за секунди да транскрибира аудио, преведе текст, обработи податоци или да создаде основна содржина. Токму затоа, едноставните задачи сè почесто се автоматизираат, а од работниците се очекува да знаат да ја контролираат, коригираат и надградуваат работата на ВИ.
Податоците од Upwork покажуваат дека кај едноставните задачи што се извршуваат со помош на ВИ, заработката во 2026 година паднала за 28 проценти. Од друга страна, кај посложените професионални услуги каде се користи ВИ, обемот на работа пораснал за 72 проценти.
Истовремено, побарувачката за вештини поврзани со ВИ расте. Во 2025 година на Upwork побарувачката за такви вештини се зголемила за 109 проценти, додека работата поврзана со ВИ видео и интеграција на ВИ забележала уште поголем раст.
Се појавуваат и нови професии – ВИ интегратори, специјалисти за автоматизација, ВИ видеокреатори и уредници на содржина создадена со ВИ. Расте и потребата од луѓе кои ќе ги проверуваат и коригираат резултатите што ги создава технологијата.
За македонските фриленсери тоа значи дека времето кога можеше да се заработува само со едноставни онлајн задачи постепено завршува. Новиот пазар ќе бара конкретна професионална вештина плус знаење како да се користи ВИ.
Прашањето веќе не е дали ВИ ќе ја промени онлајн работата, туку кој ќе успее најбрзо да се прилагоди на промената.