Според податоците од пребарувањата на грчката платформа за недвижности Spitogatos во вториот квартал од годинава, најголем интерес за имоти за одмор покажуваат купувачи од САД, Германија и Велика Британија. Следуваат Бугарија и Србија, а интерес има и од Холандија и Швајцарија. Покрај Халкидики, странските купувачи разгледуваат имоти во Атина, околината на Солун и јужниот дел на Атика.
Колку чини квадрат на Халкидики?
Халкидики е меѓу најбараните дестинации за купувачите од Балканот и Централна и Источна Европа. Но, цените на недвижностите таму значително се разликуваат од оние што некогаш се сметаа за „поволни“ за имот покрај море.
Највисоки просечни огласени цени има во Ситонија, каде квадратен метар годинава достигнува околу 3.000 евра.
На Касандра, просечната цена е околу 2.895 евра за квадратен метар, додека во Неа Каликратија квадратот се нуди за приближно 2.513 евра.
Тоа значи дека, ако се земат овие просечни цени како основа, апартман од 40 квадратни метри би чинел околу:
- 100.500 евра во Неа Каликратија
- 116.000 евра на Касандра
- 120.000 евра во Ситонија
Станува збор за ориентациска пресметка, бидејќи цената на конкретен имот зависи од повеќе фактори – локацијата, годината на изградба, состојбата на недвижноста, погледот и близината до морето.
Интересот и понатаму расте
И покрај високите цени, странскиот интерес за грчките недвижности не се намалува. За многу купувачи имотот повеќе не е само место за неколкунеделен одмор во текот на летото. Тој може да претставува и инвестиција која дел од годината ќе се издава на туристи.
Во одредени делови околу Атина цените се уште повисоки. Во Сарони, просечната огласена цена достигнува околу 3.200 евра за квадрат, во Анависос е околу 2.941 евро, а во Порто Рафти околу 2.667 евра за квадратен метар.
Од друга страна, постојат и локации каде недвижностите се поевтини. Во Еретрија, просекот е околу 1.635 евра за квадрат, во Каламос околу 1.615 евра, во Кератеа околу 1.875 евра, а во Артемида приближно 1.862 евра за квадратен метар.
Разликите покажуваат дека грчкиот пазар на недвижности е далеку од униформен – цените се движат од релативно достапни до исклучително скапи туристички локации.
Цените продолжуваат да се зголемуваат
Дополнителен показател за силната побарувачка е и годишниот раст на цените. Во Порто Рафти, просечните огласени цени се зголемиле за 14,7 проценти во споредба со истиот период минатата година. Во Палеа Фокеа, растот достигнува 14,3 проценти.
Уште поскапи се некои од островите во Саронскиот Залив. На Спецес, просечната цена достигнува дури 4.615 евра за квадратен метар, што е околу 10 проценти повеќе од лани.
На Порос, просекот е 3.207 евра за квадрат, со годишен раст од дури 20 проценти, додека на Егина квадратен метар во просек се нуди за околу 2.692 евра.
Ниту Пелопонез не заостанува. Во Нафплио, просечната огласена цена е околу 2.778 евра за квадрат, во Каламата околу 2.892 евра, а во Источна Мани приближно 2.727 евра за квадратен метар.
Халкидики и понатаму е најинтересен за Македонците
За македонските купувачи, сепак, Северна Грција останува особено атрактивна. Солун е на само неколку часа возење од Македонија, додека Халкидики со години е една од омилените летни дестинации на македонските граѓани.
Затоа, растот на цените на недвижностите во овој дел од Грција има особено значење и за македонскиот пазар. За многумина прашањето веќе не е само колку ќе чини летниот одмор во Халкидики, туку и колку би чинело да се има сопствен апартман таму.
А според актуелните просечни цени, за имот на најбараните локации денес е потребен значително поголем буџет отколку порано.