Според анализата на Дејан Трајковски, ова намалување засега е во рамките на просечниот сезонски пад. До почетокот на влажниот период, кој вообичаено започнува во декември, се очекува нивото да се намали за уште 20 до 25 сантиметри.
Сепак, годинава не се очекува нов историски минимум. Обилните врнежи во претходната сезона го зголемиле нивото на езерото за 111 сантиметри, што значително ја подобрило моменталната состојба.
Но, долгорочниот тренд и понатаму загрижува. Во последните две години езерото губело по околу 50 до 55 сантиметри годишно, што е значително над повеќегодишниот просек од околу 18 сантиметри.
Според податоците на НАСА, од 1984 до 2020 година Преспанското Езеро изгубило околу 7% од површината и речиси половина од својот волумен. За запирање на овој тренд би биле потребни неколку последователни влажни сезони со обилни врнежи.