Грчките власти ги заоструваат контролите, а за туристите најголемиот проблем не се само високите казни, туку и мерките што следуваат по прекршокот – одземање таблички и возачка дозвола.
Повеќе нема можност за олеснување со плаќање половина казна. Се плаќа целосниот износ, а во дел од случаите возачите практично остануваат без автомобил во Грција, бидејќи со одземени таблички не можат да го користат возилото.
Еве на што треба особено да се внимава.
Пушење во автомобил
Пушење во возило во кое има дете помало од 12 години се казнува со 1.500 евра. Доколку се пуши во такси или во јавен превоз, казната изнесува 3.000 евра, а дополнително се одзема и возачката дозвола на еден месец.
Појаси и детски седишта
Неврзани патници во автомобил значат казна од 150 евра по лице. Истата казна ја плаќа и возачот, па вкупниот износ лесно може да надмине 800 евра.
Детско седиште е задолжително за деца до 12 години или до 135 сантиметри висина. За непочитување на ова правило казната е 350 евра.
Возење во папучи
Возење со обувки што не се фиксирани за ногата, како папучи или јапанки, се казнува со 50 евра. Причината е тоа што се смета дека возачот нема целосна контрола врз возилото.
Црвено светло и знак „стоп“
Најстрого се казнуваат поминување на црвено светло и непочитување на знакот „стоп“.
За поминување на црвено светло казната е 700 евра, со одземање на возачката дозвола на 60 дена и табличките на 20 дена.
За непочитување на знакот „стоп“ казната исто така изнесува 700 евра.
Користење мобилен телефон
Разговор на мобилен телефон без „hands-free“ уред се казнува со 350 евра, а возачката дозвола се одзема на 30 дена.
Построги мерки за повторени прекршоци
Од 2026 година, доколку ист прекршок се повтори по трет пат, возачката дозвола може да биде одземена дури до осум години.
Паркирање на место за лица со попреченост
За паркирање на место означено за лица со попреченост казната е 1.000 евра, а следува и одземање на возачката дозвола на 180 дена.