Откако германската влада најави дека пекарниците, слаткарниците и библиотеките ќе можат да работат и во недела, повторно се отвори дебатата за поширока либерализација на работното време на продавниците за време на викендите.
Претседателот на Комисијата за економија при германскиот Бундестаг, Кристијан фон Штетен, изјави дека се залага за значително олеснување на сегашните ограничувања за работа во недела.
„Бундестагот одлучува за работата на вработените во недела, додека сојузните покраини одлучуваат за работното време на продавниците. Во двата случаи се залагам за значително проширување на постојните правила“, изјави тој.
Добро за економијата
И координаторот на германската влада за туризам, Кристоф Плос, ја поддржа оваа иницијатива, оценувајќи дека таа ќе биде од корист за германската економија.
Според него, атрактивната понуда на продавници е важен фактор при изборот на туристичка дестинација. Тој додава дека сегашните правила потекнуваат од време кога онлајн трговијата практично не постоела.
„Пофлексибилното работно време ќе им овозможи на германските трговци полесно да се натпреваруваат со интернет-продавниците, кои се достапни 24 часа дневно“, смета Плос. Според него, либерализацијата би придонела и за оживување на градските центри.
Синдикатите предупредуваат: Работниците ќе ја платат цената
Од друга страна, синдикатот Ver.di остро се спротивставува на предлогот.
Претставничката на синдикатот, Силке Цимер, оцени дека укинувањето на неделниот одмор е „погрешен пристап кој оди на штета на работниците“.
Таа истакна дека неделата за многу вработени е единствениот ден што однапред можат сигурно да го испланираат за одмор, време со семејството и психофизичко закрепнување.
Според неа, продолжувањето на работното време нема автоматски да донесе поголем промет ниту да ги оживее градските центри. Напротив, најголема корист ќе имаат големите трговски синџири, кои полесно можат да организираат работа во недела, додека малите и средните бизниси ќе бидат ставени во понеповолна положба.
Одлуката е во рацете на сојузните покраини
Повод за новата дебата е најавата на германската влада дека од 1 јануари 2027 година ќе се продолжи дозволеното работно време во недела за пекарниците, слаткарниците и библиотеките.
Според предлогот, пекарниците ќе можат да работат најмногу осум часа во недела, а јавните библиотеки шест часа.
Инаку, од реформата на германскиот федерален систем во 2006 година, работното време на продавниците е во надлежност на сојузните покраини. Повеќето од нив веќе ги либерализираа правилата, па продавниците во работните денови можат да работат и 24 часа.
Само Баварија и Сар покраина сè уште ги задржуваат построгите правила, според кои продавниците мора да се затворат најдоцна до 20 часот.
Во моментов, отворањето продавници во недела е дозволено само во исклучителни случаи, како што се специјално одредени продажни недели или празнични настани.
И црквите се против
Против ублажувањето на правилата за работа во недела се изјасни и Социјалниот сојуз на Германија (SoVD).
Претседателката Михаела Енгелмаер нагласи дека неделата е многу повеќе од економско прашање.
„Тоа е незаменлив ден за одмор, семејството и општествената поврзаност“, изјави таа, додавајќи дека работата во недела треба да остане ограничена само на дејности од јавен интерес, како што се здравството, полицијата и јавниот превоз.
Сличен став има и Евангелистичката црква во Германија, која предупредува дека слободната недела е важна за целото општество, без разлика на верските убедувања.
Според црквата, потребен е барем еден ден во неделата кога најголем дел од луѓето ќе бидат слободни истовремено, бидејќи тоа создава простор за семејството, пријателите, соседите и волонтерските активности, што ја зајакнува општествената кохезија и позитивно влијае и врз работниот живот.
Сличен став претходно изнесе и Католичкото работничко движење на Германија, кое оцени дека неделата без купување не е остаток од минатото, туку неопходно време за одмор, психичка регенерација и подобар баланс помеѓу работата и приватниот живот.