Зголемувањето на цените и инфлацијата ќе останат убедливо најголемиот проблем за граѓаните на Западен Балкан во 2025 година, според најновото истражување на „Балкан барометар“, чии резултати беа презентирани денес во Брисел.
Овие економски предизвици ги наведоа дури 66 проценти од испитаниците, што е мало зголемување во споредба со 64 проценти претходната година. Општата економска состојба е на второ место, со 44 проценти, додека корупцијата ја сметаат за клучен предизвик 35 проценти од граѓаните.
Еден од најважните наоди на овогодинешниот Барометар е значителното зголемување на поддршката за членство во Европската Унија. Поддршката се зголеми на 64 проценти, во споредба со 54 проценти во 2024 година – највисоко ниво во последните десет години. За споредба, поддршката за членство во 2016 година беше 39 проценти. Оттогаш, процентот на оние кои сметаат дека членството во ЕУ е лошо, исто така, се намали, од 20 проценти на девет проценти.
Граѓаните на Албанија (86 проценти) и Косово (78 проценти) изразуваат најголема поддршка за членство. Во исто време, оптимизмот во врска со роковите за пристапување расте: 26 проценти од испитаниците веруваат дека пристапувањето во ЕУ е можно до 2030 година (зголемување во споредба со 20 проценти од претходната година), додека 25 проценти веруваат дека тоа би можело да се случи до 2035 година.
Граѓаните на Западен Балкан сè повеќе го поврзуваат членството во ЕУ со економски придобивки и мобилност: 47 проценти очекуваат економски просперитет, а сè поголем број ја наведуваат слободата на патување (36 проценти), како и можноста за студирање и работа во ЕУ (28 проценти).
Анкетата, исто така, покажува зголемување на довербата во одредени институции. Религиозните организации се оценети најпозитивно – 69 проценти од испитаниците изразија високо ниво на доверба, по што следува армијата (62 проценти). Полицијата, исто така, забележа значително зголемување на довербата во споредба со 2024 година.
Спротивно на тоа, домашните политички институции остануваат предмет на скептицизам. Политичките партии (77 проценти) се оние со највисоко ниво на недоверба, по што следуваат парламентите (70 проценти) и социјалните мрежи (69 проценти).
Граѓаните на Западен Балкан продолжуваат да ја гледаат регионалната соработка како важен двигател на напредокот. Повеќето испитаници веруваат дека тоа има позитивно влијание врз економијата, безбедноста и политиката. Речиси половина од жителите на регионот денес истакнуваат што ги обединува, додека само околу 14 проценти се фокусираат на разликите, покажува анкетата.
Тие ја наведуваат историската недоверба и националистичките политики како главни пречки за регионалната соработка во 2025 година, иако уделот на оние кои го гледаат национализмот како пречка се намалил од 47 проценти во 2024 година на 37 проценти.
Балкан барометар е годишно истражување за ставовите на граѓаните и деловната заедница во шест земји од Западен Балкан, кое го спроведува Советот за регионална соработка (RCC) од 2015 година.
Анкетата дава преглед на социо-економските трендови, регионалната соработка и процесот на европска интеграција и, според RCC, е еден од најважните извори на податоци за регионот.