Микеле Зуин, градски советник задолжен за буџет и оданочување, смета дека сегашната такса, која изнесува меѓу пет и 10 евра, е премногу ниска за ефикасна борба против прекумерниот туризам.
Советникот прецизира дека се разговарало и за зголемување на таксата на дури 50 евра, но додаде дека властите би можеле да се договорат за нов максимален износ од 30 евра за 2027 година, пренесува британската агенција Reuters.
Оваа туристичка такса, која се однесува само на посетителите кои доаѓаат во Венеција на еднодневна посета, беше воведена во 2024 година, што во тоа време претставуваше прва таква мерка во светот. Оние кои ја резервираат посетата однапред можат да добијат пониска цена.
Во градот кој со години се соочува со прекумерен туризам и намалување на бројот на жители, локалните власти наведуваат дека целта на мерката е да ги поттикне посетителите да ги избегнуваат најфреквентните периоди од годината, како што е празникот Први мај.