Системот „Безбеден град“ продолжува да се проширува низ Македонија. Од почетокот на следната недела, камерите за сообраќаен надзор ќе бидат активирани и на подрачјето на СВР Охрид, кое ги опфаќа Охрид, Струга, Кичево и Дебар.
Според МВР, сите потребни технички проверки и завршни тестирања се спроведени, со што се создадени услови за започнување со работа на системот.
Што ќе контролираат камерите?
Со активирањето на „Безбеден град“ се очекува да се овозможи постојан сообраќаен надзор и поефикасно откривање на прекршоците.
Целта е да се подобри почитувањето на сообраќајните прописи, да се зголеми дисциплината кај возачите и да се намали ризикот од сообраќајни незгоди.
Од Министерството апелираат до сите учесници во сообраќајот да ги почитуваат правилата, да внимаваат на поставената сигнализација и да возат одговорно.
Во кои градови веќе функционира „Безбеден град“?
Системот започна да се имплементира на почетокот на 2026 година, а досега е воведен во Скопје, Тетово и Куманово, како и на дел од автопатот „Пријателство“.
Со неговото проширување во Охрид, Струга, Кичево и Дебар, бројот на градови опфатени со сообраќајниот надзор дополнително се зголемува.
Од МВР посочуваат дека главната цел на проектот е навремено откривање на сообраќајните прекршоци и создавање побезбедни услови за сите учесници во сообраќајот.