Патувањето долго повеќе од 16.000 километри ќе трае меѓу 19 и 22 часа, а патниците за првпат ќе можат да летаат меѓу овие два града без ниту едно застанување.
Повеќе од еден век потрага по пократок пат до светот
Извршната директорка на групацијата Qantas, Ванеса Хадсон, истакна дека идејата на компанијата уште од нејзиното основање била оддалеченоста на Австралија од остатокот од светот да не претставува пречка.
„Кога во 1947 година првпат летавме на таканаречената ‘Кенгур рута’ до Лондон, имавме дури седум застанувања. Секоја нова генерација авиони отстрани по едно, а сега го отстрануваме и последното“, изјави таа.
Специјално дизајниран авион за лет подолг од 20 часа
За овој проект Qantas ќе користи специјално модифициран авион Airbus A350-1000ULR, развиен во соработка со Airbus.
Авионот е опремен со дополнителен резервоар од 20.000 литри гориво, што му овозможува да прелета повеќе од 16.000 километри без слетување и да остане во воздух до 22 часа.
Иако стандардниот Airbus A350-1000 може да прими до 480 патници, верзијата изработена за проектот Sunrise ќе има само 238 седишта распоредени во четири класи, со цел да им обезбеди повеќе простор и повисоко ниво на удобност на патниците.
Што ќе биде со патниците во економска класа?
Една од најголемите разлики во однос на моментално најдолгиот редовен лет во светот, кој го извршува Singapore Airlines на релацијата меѓу Сингапур и Њујорк, е тоа што Qantas на новата рута ќе превезува и патници во економска класа.
Од вкупно 238 седишта, дури 140 ќе бидат наменети за економска класа, што го отвора прашањето како патниците ќе поднесат лет што може да трае речиси цел ден.
Во моментов, најдолгиот директен лет за патници во економска класа исто така го извршува Qantas, на релацијата меѓу Лондон и Перт, долга 14.499 километри и со времетраење од 16 до 18 часа.
Почеток на нова ера на долголиниски летови
По рутата Сиднеј–Лондон, Qantas планира да воведе и директна линија меѓу Сиднеј и Њујорк. Точниот датум на почеток на овие летови ќе биде објавен следната година.
Компанијата ќе добие вкупно 12 специјално прилагодени авиони Airbus A350-1000ULR, а вториот авион моментално поминува низ осумнеделна програма за тестирање и сертификација.